O xuíz do Mercantil número 6 de Madrid, Francisco Javier Vaquer, decidiu autorizar a venda da planta de Clesa en Caldas de Reis ao grupo lácteo Feiraco, segundo fontes xudiciais.
Vaquer ditará un auto nas próximas horas que resolverá definitivamente o proceso de venda directa.
Os administradores concursais trasladaron ao xuíz un informe no que indicaban que a oferta presentada por Feiraco, de 10.200.000 euros, para adquirir a planta de Clesa é baixa, pero é a única recibida e aconsellaban xa que logo a súa venda.
Así mesmo, suxeríanlle que se fixese publicidade da operación por se estivese interesada outra firma.
Tras estudar a situación, o xuíz do Mercantil decidiu adxudicar a planta a Feiraco e abrir un prazo de cinco días por se xorde un novo ofertante.
Os administradores concursais encargaranse de xestionar a venda da marca de xeados Roine, pertencente ao grupo Clesa.
Feiraco espera recuperar a todo o persoal da planta de Caldas a medida que se vaia estabilizando o mercado, salvo aos prexubilados, e incrementala a medio prazo ao contemplar a elaboración de iogures de froitas e natillas que actualmente se fabrican en Madrid.
