O xulgado de instrución número 2 do Porriño iniciou os trámites, en colaboración coa embaixada norteamericana, para a repatriación do cadáver de James D.C., turista de EE UU falecido no accidente ferroviario do venres, no que tamén perderon a vida o maquinista, de nacionalidade portuguesa; o interventor; e un mozo de 23 anos, os dous veciños de Vigo.
Segundo informaron fontes do Tribunal Superior de Xustiza de Galicia, a identificación desta vítima xa puido facerse de xeito oficial, mentres que o xulgado segue esperando a chegada da pegada indubitada do outro falecido de nacionalidade estranxeira, o maquinista luso José Arnaldo R.M. Tras o accidente do venres, o xulgado reclamou a cooperación das autoridades competentes de EE UU e Portugal para que remitisen as pegadas das vítimas destes países, co fin de proceder á identificación oficial.
Así mesmo, pediuse tamén a colaboración das embaixadas, do Consulado de Portugal en Vigo e do Ministerio de Xustiza para axilizar esta xestión, e non ter que solicitar as pegadas a través dunha comisión rogatoria (unha vía máis lenta).
O xulgado inicia os trámites para repatriar o corpo do turista de EE UU tras a súa identificación oficial
Segue esperando a chegada da pegada indubitada do outro falecido de nacionalidade estranxeira do descarrilamento do Porriño, o maquinista luso José Arnaldo R.M.
