O Real Madrid revalidou este sábado o título de Supercopa Endesa cun folgado e cómodo triunfo ante o Barcelona por 99-78 na final disputada no Buesa Area de Vitoria. Os de Pablo Laso encadean o seu terceiro trofeo seguido, desde o ano 2012, e repiten vitoria e escenario como hai doce meses cando tamén venceron no pavillón vitoriano ante o mesmo rival. A vitoria sérvelles para compensar o ocorrido no último enfrontamento oficial, cando o Barcelona levou a liga 2013-2014.
Este sábado só tivo cor branca o partido polo título porque o Real Madrid sempre foi por diante, salvo uns segundos no inicio do partido. Ademais recuperou os seus constantes habituais de xogo veloz, alegre e alta anotación ata chegar case aos cen puntos.
Sergio Llull foi o baluarte do triunfo, con 21 puntos e nomeado ademais mellor xogador do trofeo da Supercopa.
O Real Madrid apostou pola envergadura de Ayón e Mejri no quintento inicial para equiparar a fortaleza interior do Barcelona.
Con todo o desequilibrio chegou desde o exterior. Sergio Llull prorrogou o seu estado de graza da semifinal. O balear logrou 15 dos primeiros 22 puntos do seu equipo, mentres o Barcelona só tivo a Tomic como referencia nos primeiros oito minutos, 22-12.
O Real Madrid atopou o xogo fluído e viu canastra con facilidade. Todo o contrario que o equipo catalán ao que lle custaba ganduxar xogadas e asinou unhas pésimas porcentaxes de acerto, sen anotar ningún dos sete triplos intentados.
Cun xogo alegre dos de Pablo Laso chegouse ao final do primeiro acto case dobrando aos de Xavi Pascual, 29-14.
Xavi Pascual axitou o seu banco en busca do quinteto propicio para entorpecer a marcha do Real Madrid. Deshaun Thomas luciu as súas boas mañas de tirador con dous triplos e a aparición de Oleson e Satoransky que estreitaron o marcador, 40-36 minuto 18.
A saída da cancha de Llull secou a produción ofensiva dos brancos pero atoparon a vía interior. Os puntos de Bourossis, Ayón máis a axuda dun triplo de Campazzo e unha canastra acrobática do recuperado Sergio Llull sobre a bucina permitiron aos de Laso chegar cunha cómoda renda ao intermedio, 49-39.
Na continuación púidose apreciar un retrinco próximo ao baloncesto de ambos os conxuntos cando teñan máis rodaxe nas súas pernas. Volveu aparecer o xogo electrizante e meteórico do Real Madrid cunha achega coral de Sergio Rodríguez ao temón e os sempiternos Llull e Rudy Fernández. Teimou e atascouse o Barcelona cos intentos desde a longa distancia, pero non era o seu día. Así os de Pablo Laso despegáronse cunha máxima renda de 16 puntos, 69-53 no minuto 27.
Non atopou o xeito de recortar esa distancia o equipo catalán, que afrontou o cuarto final con doce puntos de desvantaxe, 71-59, e buscando unha remontada imposible. Pero o conxunto de Xavi Pascual baixou os brazos demasiado pronto e deixouse levar ata o bocinazo final cun intercambio de canastras.
