O secretario xeral do PPdeG, Miguel Tellado, reprochou este venres á oposición a actitude "inquisitoria" que está a manter en relación á investigación xudicial aberta sobre o director xeral de Ordenación Forestal da Xunta, Tomás Fernández-Couto, á vez que reivindicou a "presunción de inocencia" de todos os imputados.
Preguntado respecto diso en rolda de prensa, criticou que os grupos censuren "de forma tan alegre" a unha persoa "investigada unicamente pola contratación dun servizo que ten a finalidade de garantir que houbese medios aéreos para a extinción dos lumes".
En concreto, a investigación sobre este alto cargo da Xunta (e outros dous que xa cesaron) iniciouse tras unha denuncia presentada pola Fiscalía en 2013, pois apreciou "un grave quebranto" dos principios de "igualdade, publicidade e legalidade" no contrato de helicópteros da Xunta, ao non permitirse "a concorrencia doutras posibles empresas" en 2012 e encomendalo a Inaer por 5,4 millóns de euros.
Neste escenario, sen deixar de lado nin o "respecto absoluto" á Xustiza nin á presunción de inocencia dos investigados, Tellado recordou que o propio presidente da Xunta, Alberto Núñez Feijóo, xa esgrimiu informes que sosteñen que "as cousas se fixeron correctas".
EN MAREA. Pola súa banda, o portavoz de En Marea, Luís Villares, sinalou que o director xeral de Montes, Tomás Fernández-Couto, debería "ser cesado inmediatamente" tras ser investigado por un presunto delito de prevaricación nunha causa aberta polo xulgado de instrución número 3 de Santiago, pola adxudicación "irregular" do servizo de helicópteros de loita contra incendios nas campañas 2011, 2012 e 2013.
Por iso, o portavoz de En Marea cre que non debería de "permanecer" no cargo, ademais de por ser o responsable do deseño dos políticas contraincendios dos "últimos vinte anos" e "de que se incumpra a lei constantemente nos sectores que del dependen". "Todos os indicios converxen ao mesmo lugar, á mesma persoa. O responsable das políticas forestais dos últimos vinte anos, das políticas de extinción dos últimos vinte anos, é a persoa responsable de que se incumpra a lei constantemente nos sectores que del dependen. Pensamos que non debe de estar nin un día máis ao mando da dirección xeral de Montes e debe de ser cesado inmediatamente", resolveu.
Villares apoia ao colectivo de bombeiros comarcais de Lugo
O PP lamenta a actitude "inquisitorial" da oposición con Fernández-Couto
Villares insiste no cesamento de alto cargo de Medio Rural tras a súa imputación e, desde Lugo, apoia aos bombeiros dos parques comarcais
