O Sergas confirmou a existencia dun quinto caso de lexionela en Lugo, unha vez obtido o resultado das probas médicas que lle foron practicadas a un ancián da residencia de persoas maiores das Gándaras, que ingresou onte cun cadro de febre alta. En todo caso, as mesmas fontes sanitarias indicaron que o paciente "evoluciona favorablemente".
O ancián foi ingresado onte no HULA tras ser trasladado nunha ambulancia do 061 e, ao presentar síntomas que poderían coincidir cos que provoca unha infección por lexionela, practicáronselle as probas pertinentes para destacar ou confirmar a presenza da bacteria.
A propia delegada territorial da Xunta de Galicia, Raquel Arias, xa recoñecía onte que "aínda pode aparecer algún caso de persoas que estean incubando a enfermidade, porque a collesen con anterioridade" aos labores de desinfección, que comezaron o pasado luns na residencia de maiores.
Neste momento, hai catro anciáns ingresados no centro sanitario a causa do mencionado brote de legionella.
En canto aos outros tres anciáns que permanecían ingresados como consecuencia deste brote, as mesmas fontes do Sergas informaron de que todos, en maior ou menor medida, tamén seguen "evolucionando favorablemente" da enfermidade e o seu estado experimentou "unha melloría".
Polo demais, na residencia de maiores das Gándaras, onde esta mesma semana detectouse o brote de lexionela, xa volve utilizar a auga quente sanitaria para as duchas, logo dos traballos de desinfección que foron realizados nos últimos días para eliminar o foco dese contaxio.
Fontes da Xunta de Galicia confirmaron que a pasada noite comezaron a utilizarse de novo as duchas de auga quente, logo de varios días nos que se interrompeu o seu uso, precisamente porque foi nesa parte da instalación sanitaria onde se detectou o foco de lexionela.
O Sergas confirma un quinto caso de lexionela en Lugo
