Os incendios forestais rexistrados nas inmediacións do canón do Sil, no concello ourensán de Nogueira de Ramuín, e de Lousame, A Coruña, danse por extinguidos, tras queimar 75 e 26,7 hectáreas, respectivamente.
Medio Rural informou de que o primeiro dos lumes, localizado na parroquia de Santo Estebo de Rivas de Sil, quedou extinguido sobre as 12,58 horas deste mediodía e, segundo a estimación provisional, afectou a 50 hectáreas de superficie arboredo e 25 de terreo raso.
A Xunta, no entanto, destacou desde o primeiro momento que o lume non afectou ao espazo protexido dos canóns do Sil.
Por outra banda, tamén quedou extinguido desde o mediodía o lume no concello coruñés de Lousame, na parroquia de Tállara, que comezou na madrugada de onte, venres.
Segundo estimacións provisionais, a superficie afectada é de 26,7 hectáreas, das que 20,7 corresponde a superficie rasa e o resto, a arboredo.
