CALDAS. Feiraco é xa a nova propietaria da planta de Clesa en Calda tras concluír o prazo de dez días outorgado polo xuíz do Mercantil numero 6 de Madrid, Francisco Javier Vaquer, e non haberse presentado ningunha outra oferta, segundo fontes xudiciais. A cooperativa láctea con sede en Negreira faise coa propiedade por 10,2 millóns de euros.
Agora resta materializar os trámites administrativos para que Feiraco poida facerse cargo da planta e decidir o persoal que iniciará a nova etapa. «Xa se prevía que ía suceder isto, aínda que sempre estás á expectativa. Agora quedan asuntos administrativos como dar traslado ás partes da operación de compra entre Feiraco e a Administración Concursal e que Feiraco decida o persoal que vai quedar» sinalou Lola Ramos, presidenta do comité de empresa. «Nós esperamos que nun par de semanas estea todo resolto para que a tranquilidade volva a fabrícaa porque a boa convivencia é básica», afirmou.
O proxecto contempla que serán 35 os traballadores que comezarán a nova andaina, para ir incorporándose o resto en función do mercado.
