Unha explosión de gas rexistrada nun piso da rúa de Cangas, en Vigo , provocou feridas e queimaduras á dona da vivenda, informou a central que se ocupa de coordinar a atención ás urxencias que se producen en Galicia.
Segundo os datos facilitados ao 112, a vítima sofre queimaduras no 40% do corpo. Tivo que ser evacuada polos efectivos sanitarios ao Hospital Povisa da cidade.
A explosión tivo lugar despois de que se producise unha fuga de gas no forno da cociña. A deflagración ocorreu cando a vítima abriu a porta do forno. Con todo, os danos afectan unicamente á cociña da vivenda. Foron varias as persoas que chamaron ao 112 Galicia tras producirse a explosión, sobre as 13.30 horas deste domingo.
Acto seguido, o persoal do Centro Integrado de Atención ás Urxencias alertou ao 061-Urxencias Sanitarias e aos Bombeiros de Vigo . Tamén se informou a Protección Civil, á Policía Local e á compañía responsable da subministración do gas.
O servizo de gas propano xa quedou restablecido. A esta hora, o persoal da empresa do gas continúa no punto revisando a instalación.
Unha muller de 57 anos sofre queimaduras no 40% do seu corpo tras unha explosión de gas en Vigo
A deflagración produciuse cando a vítima abriu o seu forno de gas propano mentres cociñaba
