Achan o corpo sen vida dun pescador xubilado a bordo da súa lancha en Bueu

Un pescador xubilado veciño de Bueu, de 67 anos, foi achado morto a bordo da súa embarcación de pesca deportiva nas inmediacións da praia de Loureiro, neste municipio pontevedrés.

O falecido, M.S.O., adoitaba saír de pesca deportiva na pequena embarcación da súa propiedade, duns 4 metros de eslora e con motor fose borda, en que foi atopado sen vida.

A Policía Local de Bueu relatou que as primeiras hipóteses apuntan a que o falecido sufriu un infarto mentres se atopaba pescando, como facía de xeito regular, e que foi a tripulación dun barco que se atopaba faenando na zona quen observaron que o home "estaba tombado" sobre a lancha, polo que decidiron achegarse para comprobar a súa situación.

Os propios mariñeiros do barco foron os que recuperaron o cadáver e transportárono a terra, onde esperaban axentes da Garda Civil e a Policía Local, que esperaron á chegada do forense para realizar un primeiro recoñecemento, antes de que o xuíz decretase o levantamento do corpo.

Comentarios