O cadáver achado o pasado día 5 flotando na entrada do peirao de Lorbé, na Coruña, foi identificado como Cristian Calvo Rodríguez, o mozo de 23 anos, natural de Cabanas e veciño de Sada, que desaparecera na costa cando extraía percebe, indicaron a Efe fontes próximas á familia do mozo falecido.
Unha patrulleira da Garda Civil recuperou o corpo da auga o pasado día 5, despois de que un pesqueiro que faenaba pola zona dese o aviso aos servizos de urxencias.
Desembarcado no peirao de Oza, na Coruña, foi trasladado ao Hospital universitario da cidade (CHUAC) para proceder á autopsia.
Fontes do Instituto Armado indicaron a Efe que o corpo estaba irrecoñecible, logo de varios días de marusía e mar de fondo, polo que precisaron facer probas de ADN.
Desde o primeiro momento, os axentes consideraron que podía tratarse do mozo que desaparecera días atrás na zona de Seixo Branco, en Oleiros, onde acharon a súa bicicleta e outros efectos persoais.
O mozo fora á zona de rocas coa intención de recoller percebes e perdéuselle a pista.
A súa nai denunciou a desaparición tres días despois e foi buscado sen éxito durante varios días por efectivos de Salvamento Marítimo, Garda Civil e Protección Civil co apoio do helicóptero Helimer.