O aventureiro español Jesús Calleja mostrou a súa indignación cos incendios que afectaron estes días á nosa comunidade –que deixaron catro persoas falecidas e obrigaron a desaloxar a centos de habitantes– a través da súa conta de Facebook. "Difícil de explicar o que sinto ao ver a natureza arder, as persoas morrer, a vida desaparecer...", así empeza a publicación.
O montañeiro cualifica o ocorrido de terrorismo: "Pirómanos seres repugnantes sodes os peores terroristas, aniquilades a vida en todas as súas formas incluída a humana". Con todo, a fotografía que acompaña ao texto non se corresponde con ningún dos lumes que azoutaron Galicia.
O español diríxese á clase política e esíxelle que tomen cartas no asunto, asegurando que o seu voto irá para aqueles partidos que apliquen "a lei máis dura posible" para facer fronte aos incendios provocados.
A publicación foi moi aplaudida entre os internautas e xa acumula case 140.000 reaccións e máis de 80.000 compartidos.
Calleja, indignado cos incendios de Galicia
O aventureiro compartiu nas redes a súa rabia polos lumes que arrasaron a comunidade e deixaron catro mortos
