O avogado da asociación ecoloxista Arco Iris, Manuel Meiriño, presentará mañá nos xulgados coruñeses o anuncio de recurso de casación deste colectivo á sentenza da Audiencia Provincial sobre os danos orixinados tras o accidente do petroleiro Prestige en novembro de 2002.
Arco Iris informou nun comunicado deste recurso, avanzado horas logo de facerse público o fallo, que será transmitido ao Tribunal Supremo, competente en dilucidar se a cualificación dos feitos argumentada pola Audiencia Provincial da Coruña "foi a correcta", sostivo.
O prazo legal para interpor este recurso finalizará o vindeiro xoves, momento a partir do cal a asociación ecoloxista deberá realizar a presentación material do documento do recurso.
Para iso disporá dun prazo, pendente de varios "factores e circunstancias, como a necesidade de traducir ao grego a sentenza e comunicarlla ao capitán e ao xefe de máquinas" do Prestige.
O tribunal do Prestige absolveu ao exdirector xeral da Mariña Mercante José Luis López Sors, ao xefe de máquinas, Nikolaos Argyropoulos, e ao capitán do barco, Apostolos Mangouras, dos delitos contra o medio ambiente, e só condenou a este último a nove meses de prisión por desobediencia.
