A Policía Nacional alertou este venres de que recibiu en distintas oficinas de Galicia denuncias nas que as supostas vítimas manifestan ser estafadas por dous individuos que se fan pasar por técnicos das compañías de gas e electricidade.
Nun comunicado, a policía relata que estes suxeitos se acoden nos domicilios, normalmente de persoas maiores que viven soas, coa escusa de realizar unha inspección de seguridade dos elementos e complementos da instalación, así como dos aparellos que dependen da mesma.
A actuación máis común é finxir que fan revisións ou reparacións, polas que cobran en efectivo.
Noutras ocasións, os estafadores van en parella e fanse pasar por operarios dunha empresa de electricidade, aproveitan para acceder aos domicilios e conseguen que a vítima os deixe sos durante breves instantes, que aproveitan para furtar diñeiro ou calquera outro efecto de valor.
Ás veces, simplemente manifestan á persoa que habita na vivenda que ten unha débeda coa compañía subministradora e que, se non paga en efectivo nese momento, suporá a cancelación do servizo, engade a policía na mesma nota.
Por iso e para evitar ser vítimas deste tipo de estafas, aconsella non abrir a porta do domicilio ou o porteiro automático a persoas descoñecidas, e sospeitar dos servizos técnicos que non sexan solicitados, entre outras medidas.
Tamén recorda a importancia da colaboración veciñal neste tipo de feitos e recomenda avisar á policía ante calquera anomalía ou sospeita.
