Efectivos do Grumir de Redondela, en colaboración cos bombeiros de Vigo, tiveron que excarcerar esta tarde ao condutor dun turismo que quedou atrapado logo de chocar cun camión na estrada N-550 ao seu paso pola parroquia redondelana do Viso, informaron fontes do 112.
Cara ás 14.00 horas, un particular alertou ao centro de atención de urxencias de Galicia sobre un accidente entre un turismo e un camión que transportaba produtos de alimentación cuxa carga non resultou danada.
Ademais do Grupo de Intervención Rápida e dos bombeiros foron mobilizados os servizos sanitarios de urxencia, a Garda Civil de Tráfico e o persoal de limpeza e mantemento do Ministerio de Fomento para a retirada dos restos do accidente da calzada.
