Os avogados do extesoureiro do PP Luis Bárcenas, Miguel Bajo e Alfonso Trallero, renunciaron hoxe á súa defensa por "discrepancias profesionais", explicou a Efe o letrado Alfonso Trallero.
Trallero presentou esta mañá o escrito de renuncia á defensa de Bárcenas no Xulgado de Instrución 5 da Audiencia Nacional, que instrúe o caso Gürtel e, nunha peza separada do mesmo, os papeis manuscritos atribuídos a Bárcenas sobre unha suposta contabilidade B no PP.
Antes de presentar o escrito, Trallero acudiu á prisión de Soto del Real, onde está ingresado Bárcenas desde hai doce días, para comunicarlle en persoa a renuncia.
No escrito de renuncia presentado hoxe, ao que tivo acceso Efe, dise que deixarán de representalo "por razón de diverxencia de criterio profesional" e "a conciencia de non causarlle ningún menoscabo" no procedemento.
Os letrados levan encargándose a defensa de Bárcenas catro anos, desde que en 2009 Bárcenas foi imputado no caso Gürtel, e por agora o extesoureiro non ten un novo avogado.
A renuncia de Trallero e Bajo á defensa de Bárcenas prodúcese un día despois de que o diario El Mundo publicase unha entrevista ao extesoureiro na que afirmaba que o PP se financiou de forma ilegal durante vinte anos.
O pasado 27 de xuño o xuíz Ruz ordenou o ingreso en prisión incondicional de Bárcenas logo de haberlle tomado declaración sobre a súa fortuna duns 48,2 millóns de euros depositados en contas bancarias en Suíza.
