Treinta técnicos de Adif, Renfe e de Comboios de Portugal, así como peritos xudiciais revisan, desde primeira hora da mañá deste venres, os restos do 'Tren Celta' que descarrilou o pasado 9 de setembro a poucos metros da estación do Porriño, co fin de comprobar os sistemas de freado, así como a sinalización da vía.
Entre as comprobacións que se pretenden realizar inclúense as probas de presión do sistema de freado do tren, dado que o maquinista non reduciu a marcha do convoi a pesar dos avisos.
No momento do descarrilamento o tren circulaba a 118 quilómetros por hora, a pesar de que a velocidade máxima permitida era de 30, debido a traballos de mantemento da vía principal.
Os técnicos tamén comprobarán as condicións de seguridade dese tramo férreo, así como a sinalización que, segundo os datos rexistrados nas caixas negras –abertas no xulgado o pasado 13 de setembro–, estaba en funcionamento sen problemas.
Os restos da máquinaria do tren, atópanse nunha plataforma, depositada fronte á estación do Porriño, á espera de que o xulgado autorice o seu traslado por estrada a dependencias de Renfe en Redondela; mentres que os outros dous vagóns serán trasladados pola vía férrea.
