A Marea Atlántica propón, no Concello da Coruña, unha modificación no plan do Parque Ofimático coa que, afirman, "todos gañan". Aseguran que coa posta en marcha desta idea produciríase "un aforro" no municipio, polo que os residentes "non teñen que ser desaloxados" e os usuarios "teñen unha mellor solución viaria". Varios membros da Marea Atlántica, que portaron unha pancarta coa lema "Temos un desexo común", presentaron no rexistro municipal unha "proposta de modificación puntual no plan do Parque Ofimático".
Pola súa banda, Xoán Mosquera, un dos seus portavoces, explica aos medios de comunicación as vantaxes desta alternativa sobre unha zona na que existe "inseguridade xurídica", pois a semana pasada unha sentenza xudicial anulou as licitacións. Incide na "insostenibilidad urbanística dunha zona que busca construír 2.400 vivendas nunha cidade que posúe 19.000 baleiras" e que xa supera a súa edificación nun cincuenta por cento do previsto.
Esta proposta da Marea Atlántica céntrase no viaduto que cruzará Afonso Molina, desde o Ofimático ata o campus de Elviña, provocando o desaloxo e a posterior demolición dunha vivenda o pasado 27 de novembro. Con respecto a isto, os membros da Marea observan "importantes contradicións" nesta infraestrutura que, ademais, ten un "impacto" transcendente pola súa altura. Cren que a súa construción, aínda sen empezar, pode evitarse coa súa alternativa.
"Vimos propor unha mellora deste acceso que daría unhas condicións de accesibilidade e de capacidade de elección moito máis ampla e moito máis integrada na rede viaria. Queremos demostrar a non necesidade deste viaduto", apuntou. Mosquera comentou que, ao reforzar o nó de comunicacións de Matogrande, fronte ao edificio Proa, coa ampliación da rotonda actual, conseguiranse mellores resultados e as cinco familias pendentes de ser desaloxadas poderán manter as súas casas.
"Pedimos a desafectación da zona de San Vicente de Elviña do plan do Parque Ofimático", explica, e por iso presenta un proxecto que considera mellor para todos, xa que coa alternativa existe un "aforro" nas arcas municipais de catro millóns de euros, os veciños conservan as súas vivendas e os usuarios "teñen mellores conexións con máis versatilidade". "Todos os axentes gañan", sostén este portavoz da Marea Atlántica, que espera "aliviar ao mesmo tempo todas as fontes de tensión" e "facer fronte ao drama dos desafiuzamentos".
