O municipio marinense celebrará durante máis dunha semana as festas en honra á súa patroa, a Virxe do Porto, cuxas actividades xa comezaron o venres e continuarán ata o vindeiro sábado. Por este motivo, o Concello de Marín esforzouse ao máximo na promoción e organización de iniciativas festivas, tanto directamente como a través dunha intensa colaboración con diversos colectivos sociais.
Logo da presentación das Escolas Deportivas Municipais e do Trofeo Virxe do Porto de ciclismo, celebrados o venres e o sábado, este domingo comezan os pratos fortes do programa co concerto, esta tarde (20.30 horas), da agrupación O Fiadeiro na Alameda Rosalía de Castro, con entrada totalmente libre.
O evento enmárcase no programa Danza 3 da Consellería de Educación e Cultura da Xunta, co apoio do Concello, e consistirá nun espectáculo no que a música e o baile tradicional galego serán os protagonistas. A agrupación invitada exhibirá en plena rúa unha proposta artística especialmente deseñada para a ocasión, a través da que buscará a implicación do público.
Para o luns, véspera do día da patroa, programouse a actuación de Óscar Ibáñez & Tribo, que presentarán na Alameda Rosalía de Castro (20.30 horas) o seu último traballo, titulado Alén do Mar. Na actuación, Óscar Ibáñez (frautas e gaita) estará acompañado por Fernando Fraga en acordeón, Harry Price en violín, Carlos Calviño ás guitarras, Paco Dicenta tocará o baixo e Andrés Vilán como responsable da percusión e batería.
Tras este concerto será a orquestra Tokio a encargada de amenizar a velada, cunha actuación na Praza de España a partir das 22.00 horas.
PATROA. O día grande das Festas da Virxe do Porto terá lugar o martes, día 8, que é festivo local, para cando se espera unha importante participación veciñal nos actos programados, que virarán fundamentalmente ao redor das celebracións relixiosas e musicais.
O acto central terá lugar ás 12.00 horas coa misa solemne, cantada pola Coral Lembranzas, en honra á patroa no Templo Novo. Á súa finalización partirá a procesión coa imaxe da Virxe do Porto, que percorrerá as rúas A Estrada, Concepción Arenal, Jaime Janer, Real e Sol, con parada ante o Templo Antigo e regresando logo ao momento de partida por Concepción Arenal. Un ano máis, sumarase á comitiva a Escuadra de Gastadores de Alumnos da Escola Naval Militar, que irá custodiando a imaxe da patroa. Así mesmo, a Banda de Música do centro castrense marinense porá o acompañamento musical á procesión xunto á Banda de Gaitas Airiños de San Xulián, dándolle, se cabe, unha maior vistosidade. Esta última agrupación ofrecerá un concerto ás 13.00 horas na Alameda.
As actividades seguirán pola tarde (18.00 horas) co programa 'Pega o salto', organizado por Gas Natural e que se desenvolverá na Rúa do Sol con actividades para toda a familia (música, animación e merenda). A xornada pecharase cun concerto do grupo Operación Guateque a partir das 20.30 horas na Alameda.
