Un home de 32 anos e residente en Melide faleceu esta noite en Oza-Cesuras tras sufrir un accidente de tráfico. O vehículo no que circulaba saíuse da vía na AC-230, a estrada que une Curtis con Montesalgueiro, á altura de Brueiro.
O coche da vítima chocou contra un muro e acabou impactando contra un poste do tendido eléctrico. O seu cadáver quedou atrapado no interior do vehículo e tivo que ser liberado polos efectivos de urxencia.
Foi unha persoa particular a que deu conta do sinistro ao 112 Galicia ás 22:10 horas da noite do martes. Segundo detallou, o vehículo comezou a arder tras o impacto.
Con estes datos, o persoal do Centro Integrado de Atención ás Emerxencias do 112 alertou a 061-Urxencias Sanitarias e aos Bombeiros de Betanzos. Tamén se informou ao GES de Curtis e á Garda Civil. Ademais, os feitos foron postos en coñecemento da empresa eléctrica responsable do servizo na zona, para que proceda á reparación do tendido eléctrico afectado.
Tamén se solicitou, a través do 112, a mobilización do Grupo de Intervención Psicolóxica en Catástrofes e Emerxencias para que preste apoio aos familiares da vítima.
