Músicos e escritores reuniranse este venres, día 29 de setembro, na Coruña para render homenaxe á memoria dos homes que se embarcaron para loitar no Batallón Galicia e aos seus membros asasinados hai 80 anos no Acebo (A Fonsagrada) e exhumados hai unha década.
A Asociación pola Recuperación da Memoria Histórica (ARMH), explicou que os actos comezarán ás 19.00 horas no porto de Oza da Coruña, onde músicos como Carmen Torreiro e Francis Oliver ou escritores como Cesáreo Sánchez asistirán ao descubrimento dunha placa. O acto será presentado pola xornalista María Valcárcel.
Pola súa banda, na mañá do sábado, na Fonsagrada haberá un acto no monumento do Acebo, coa música de Modesto Arias e a participación de Manuel Rivas e Daniel Salgado, entre outros autores. Ademais, voluntarios da ARMH e veciños realizarán un acto simbólico.
Xa pola tarde, un evento con artistas, antropólogos, investigadores e arqueólogos recordará no Salón de Actos da Fonsagrada aos membros do Batallón que serán homenaxeados.
Músicos e escritores homenaxean aos membros do Batallón Galicia asasinados na Fonsagrada
A Coruña acollerá un acto este venres e o municipio lucense, outro o sábado con Manuel Rivas ou Daniel Salgado, entre outros autores
