Este mércores Galicia quedará nunha zona intermedia entre altas e baixas presións, pero aínda con aire frío nas capas altas da atmosfera. Con esta situación, os ceos estarán parcialmente cubertos, con chuvascos.
As temperaturas mínimas non experimentarán cambios significativos, mentres que as máximas descenderán lixeiramente. O vento soprará de compoñente norte, frouxo pola mañá aumentando a moderado pola tarde.
Nas grandes urbes galegas, os termómetros alcanzarán os 28 graos en Pontevedra, os 26º en Vigo, os 25º en Ourense e os 24 graos en Lugo nos momentos máis cálidos da xornada. En canto aos valores mínimos, na capital lucense o mercurio caerá ata marcar os 14 graos, mentres que na Boa Vila, Compostela ou a cidade olívica non baixarán de 16º.
