Faltaban uns minutos para as 10 da mañá cando dúas dos tres citados por unha suposta fraude en subvencións á Administración do Estado entraban pola porta do edificio xudicial de Lalín. E facíano co mellor dos talantes cara aos representantes dos medios de comunicación, escritos e gráficos, que alí lles esperaban. O alcalde de Dozón, Adolfo Campos Panadeiros (ex PP e actualmente mandatario non adscrito), chegou acompañado do secretario municipal, Antonio Candal. Ambos vestían roupa informal e Campos protexíase do sol da mañá cunhas lentes negras. Non só sorriu, senón que incluso chanceou coa prensa, á que outrora, vilipendiou.
No rostro do rexedor, ao que dificilmente se lle presupón unha idade de case 82 anos -que cumprirá o próximo 1 de agosto-, a tenor do ben que se conserva, reflectíase un ton amable e tamén a sensación de que o motivo polo que este martes acudía ao xulgado podería quedar en nada, simplemente por prescrición dos feitos que, por outra banda, nega que fosen delituosos. Estes remóntanse ao ano 2010 e están estreitamente vinculados á segunda fase do plan E, que puxera en marcha o Goberno de José Luis Rodríguez Zapatero para axudar a recuperar as economías locais e a crear emprego en plena cima da crise financeira.
Por aquel entón, o Concello de Dozón contratou dúas obras -o martes non quedou claro se hai unha terceira- con cargo á subvención que recibiu do Estado para a execución de traballos do Plan E: as beirarrúas de Castro Dozón e o acondicionamento dunha praza no Sisto. Segundo fontes vinculadas ao caso, que coñecen pormenores da investigación que, de oficio, abriu a Administración do Estado, sobre a posible fraude cometida no cobro das subvencións, o importe de tales obras superaba os 200.000 euros. Esta cantidade, segundo esas mesmas fontes vinculadas á denuncia por suposto fraude, recibiuna o Concello de Dozón por partida dobre, isto é, cobraría unha mesma subvención por duplicado para unha obra xa realizada. No seu día, a oposición municipal, que exerce o BNG, denunciara publicamente que se solicitaba unha axuda para unhas obras xa executadas.
Preguntado respecto diso, o alcalde de Dozón nega a maior. Nin son 200.000 euros o importe "senón uns 50.000", nin se cobrou unha dobre subvención. "Non se fixo nada ilegal... Disto entenden os técnicos e os letrados e tamén me din que isto debería estar prescrito". Nestes termos expresábase o primeiro edil do pequeno municipio dezano logo de permanecer menos de media hora nas dependencias xudiciais. Por consello da súa avogada, Beatriz Seijo, Campos mantivo silencio ante o xuíz do Xulgado de Primeira Instancia e Instrución número 2 de Lalín. "Non porque haxa nada que ocultar -esgrimiu a letrada-, senón porque a súa declaración non achegaría nada. Aquí son os documentos os que van resolver a cuestión". Tampouco o secretario municipal, cuxo avogado é Víctor Vázquez Portomeñe-Seijas, declarou ante o xuíz.
ALEGACIÓNS ESTE MES. A avogada de Campos imprimirá a máxima celeridade ao proceso. Así é que anunciou que preparará toda a documentación que demostre que o Concello seguiu todos os pasos administrativos requiridos nas subvencións do Plan E, que as obras se realizaron e que o diñeiro recibido foi destinado á execución dos citados traballos.
Esta documentación, que presentará antes de agosto, acompañaraa cun escrito de alegacións no que porá de manifesto que "de haber un feito delituoso, que non o hai, estaría prescrito".
O alcalde de Dozón négase a declarar polo seu presunto delito de fraude
O secretario municipal tampouco respondeu o xuíz ► O rexedor móstrase optimista porque, segundo a súa letrada, "de haber algún feito delituoso, que non o hai, este prescribiu"
