A xunta de persoal do CHOP, encabezada polo sindicato de recente creación Prosagal, "non acepta" as explicacións achegadas pola xerencia do CHOP na reunión celebrada o pasado mércores achega do peche de camas previsto para o verán. "Os motivos non nos convencen. Non é verdade que haxa menos patoloxías que necesiten ingreso nin menos patoloxías cirúrxicas. Ademais, resulta curioso que as camas que se manteñen pechadas por máis tempo, durante cinco meses, non son cirúrxicas, como, por exemplo, as de oncoloxía e lactantes", informou onte Prosagal nun comunicado enviado aos medios de comunicación.
A xunta de persoal entende que o peche de camas leva a cabo "por criterios economicistas" que, á súa vez, "contrastan co malgasto que supón o mantemento do convenio coa clínica privada desta cidade". Ademais, constata as advertencias sindicais e asegura que o peche de camas "diminúe considerablemente a contratación de persoal", polo que avanza que seguirá celebrando protestas por este motivo "e todo o que represente un ataque á sanidade pública".
A súa versión difire da achegada polas fontes oficiais do CHOP. Segundo estas, as estatísticas demostran que todos os veráns rexístranse un importante número de camas libres e que todas as que son obxecto do peche pódense activar "de forma inmediata" en caso de necesidade.
