O Porto de Marín iniciou 2015 con forza, pechando o primeiro cuadrimestre do ano cun crecemento do seu tráfico de mercancías nun 28,1% con respecto ao mesmo período ao exercicio anterior, cun total de 646.918 toneladas, unhas 100.000 máis que en 2014, segundo os datos avanzados este martes pola Autoridade Portuaria e Portos do Estado.
Estes datos confirman, do mesmo xeito que ocorrera co ano anterior, no que a rada marinense logrou o seu mellor resultado desde 2010, cun aumento do 2,8%, a tendencia "á consolidación e o aumento progresivo da actividade portuaria".
Esta tendencia alcista, con todo, prodúcese nun momento no que o futuro do Porto marinense está en dúbida pola sentenza do Tribunal Supremo que ordena levantar uns 300.000 metros cadrados de recheos na zona de expansión, o que suporía perder varias das empresas con maior actividade do recinto, así como tamén os peiraos con maior lonxitude e calado e incluso a liña interior de ferrocarril, tan importante para o transporte dalgunhas das mercancías que chegan ou saen por mar desde a rada.
O crecemento no tráfico portuario é xeralizado, tal como detalla a estatística feita pública este martes, aínda que destaca especialmente o aumento das descargas de graneis sólidos, cifrado nun 68% e 140.000 toneladas, entre os que se atopan os cereais e os graneis agroalimentarios.
A Autoridade Portuaria destaca que se trata do resultado do traballo conxunto de todos os operadores
O Porto de Marín está consolidado como o principal centro loxístico de recepción e posterior distribución de graneis agroalimentarios para o Sur de Galicia e Norte de Castela e León. Para iso, posúe unhas modernas instalacións de recepción, equipos de manipulación e uns operadores especializados para este tipo de tráficos de mercancías, o que contribuíu a incrementar paulatinamente as descargas, cun 2,9% o ano pasado, así como a xerar boas expectativas de cara aos próximos exercicios.
Concretamente, o Porto marinense dispón especificamente para a manipulación destas mercancías dunha terminal intermodal con 367 metros de atracada e calados de entre 9 e 12 metros, o que permite a chegada de buques de gran tamaño. Así mesmo, conta con dous guindastres pórtico de 16 toneladas e un terceiro de 30, un guindastre automóbil e tolvas ecolóxicas, medios que contribuíron a facer desta rada unha das principais referencias en materia de graneis sólidos, con especial incidencia no Noroeste da Península.
XERAL. A mercancía xeral conseguiu tamén un lixeiro incremento con respecto ao ano anterior, con case 12.000 toneladas máis. A pasta de papel, incluída neste apartado, é outra das mercancías relevantes na estatística portuaria, situándose en torno ao 40% do xeral e ao 20% do total do Porto nos últimos exercicios. Este material embárcase na terminal cuberta situada no antigo peirao comercial, propiedade de Ceferino Nogueira, a única existente en España e no Sur de Europa, que vén funcionando cunha importante actividade desde o ano 2002.
Foi unha gran aposta do Grupo Ceferino Nogueira, que realizou o investimento en solitario co fin de facilitar a saída de pasta de papel de Ence nas mellores condicións, así como a chegada e partida doutros materiais como madeiras e derivados, ademais de produtos siderúrxicos.
CALIDADE E EFICACIA. O resultado, segundo a opinión do equipo que preside José Benito Suárez Costa, é froito do traballo conxunto da Autoridade Portuaria e das empresas que integran a comunidade portuaria, así como do compromiso de ofrecer altos niveis de calidade no servizo e trato personalizado a cada cliente e mercancía. Neste sentido, sinala que "a eficiencia operativa do Porto de Marín está a ser un elemento clave de competitividade no sector, así como as opcións de transporte intermodal buque-camión-ferrocarril que ofrece o porto".
O ramal ferroviario é un dos aspectos nos que cabe pór o acento dentro dos datos da estatística portuaria do ano pasado. Concretamente, unhas 317.000 toneladas de mercancía foron transportadas a través de ferrocarril, o que supón máis dun 16% do volume global de tráficos. Trátase dunha cantidade moi superior á media do sistema portuario estatal, situando ao Porto de Marín como un dos primeiros de España en utilización de transporte combinado.
