A Xefatura Provincial da Garda Civil de Tráfico ten orde xudicial de precintar a maquinaria e os vehículos de Explotación Mineira de Campomarzo S.A., empresa do Grupo Indeza fundado por Ángel Fernández Presas. O Xulgado do Social Número 2 de Pontevedra autorizou tamén o embargo das súas contas bancarias debido ao incumprimento no pago de nóminas e indemnizacións que a firma situada en Silleda debe a extrabajadores con despedimento improcedente recoñecido en sentenza firme en novembro de 2013.
A decisión deuna a coñecer o vernes o xefe comarcal do sindicato CIG, Antón Álvarez Merayo, acompañado de dúas dos seis traballadores despedidos -o sindicato representa a tres deles-. A estes tres, a empresa debe aínda 72.470 euros, aos que hai que sumar 13.000 de intereses e costas de execución. Con todo, a débeda total da firma sería maior xa que o sindicalista asegura que o resto de operarios están na mesma situación.
En decembro de 2014 houbo un acordo entre as partes que fixaba a suspensión temporal dun embargo de bens xa ditado a cambio do compromiso da firma de cumprir un calendario de 24 pagos -un cada mes-, pero segundo CIG, o último abonado foi o pasado agosto, e con atraso. Así é que o xulgado ordena o precinto de dous camións dumper e dun todoterreo, así como a citada retención de contas. "A nós déixanos marchar e meten outra xente. E a esa xente pódelle pagar e a nós non?", pregúntase Antonio González, un dos despedidos.
