A plataforma La lona de la verguenza de Bueu, creada polos veciños do edificio Pintos, contra os que hai unha orde de desaloxo antes do día 2 de novembro próximo para levar a cabo unha demolición parcial do inmoble, realizou onte unha firma simbólica do escrito que dirixirá á Defensora do Pobo, Soledad Becerril Bustamante, para solicitar a súa intervención e tratar de evitar a medida ordenada polo Tribunal Superior de Xustiza de Galicia e o Concello de Bueu sen que os propietarios sexan previamente indemnizados.
No documento solicitan a intervención da Defensora do Pobo ante o Concello de Bueu, "para que quen somos propietarios civís plenos e de boa fe desde fai 25 anos non sexamos, á nosa costa, desaloxados o 2 de novembro de 2015 sen previa fixación nin aseguramento por parte da Administración local da indemnización que nos corresponde".
Ademais, achacan todo o problema a «unha cuestión de ilegalidade urbanística da que somos vítimas e non responsables e da que, pola contra, si é responsable o Concello de Bueu que, con vesania, preténdenos lanzar».
Durante a reunión, na que participaron representantes da maioría da vintena de familias afectadas pola orde de desaloxo, analizaron diversas propostas para levar a cabo mobilizacións que fagan visible o seu problema, así como a posta en marcha dunha campaña de recollida de firmas na plataforma Change.org para demandar «unha saída digna e xusta» á situación na que se atopan.
«Os veciños do edificio Pintos seguimos na loita para conseguir unha saída digna e xusta á situación na que nos atopamos como consecuencia do anuncio de demolición do edificio onde vivimos», sinalan nun comunicado os afectados, engadindo que «se nada cambia nas próximas semanas, o día 2 de novembro seremos desaloxados forzosamente polas forzas e corpos de seguridade, tal como indica a resolución da Alcaldía de Bueu do pasado día 18».
«A pasividade do Concello de Bueu é evidente, xa que segue sen dar un paso á fronte nin responder ás dúas reclamacións dos veciños, consistentes en que emita unha declaración institucional na que pida perdón aos veciños e, por outra banda, indemnice a todos e cada un dos afectados por unha neglixencia no cumprimento das súas competencias, polas que o TSXG condenou única e exclusivamente á Administración local», explican.
REPETICIÓN. Neste sentido, consideran que «está a repetir a evidente pasividade que demostrou en 1986, tal como indica a sentenza de 1990 que agora se quere executar, xa que non busca ningunha solución que poña fin a esta situación, onde os afectados non somos os responsables e os responsables non son afectados».
á recollida de firmas de forma presencial iniciada a semana pasada, súmase agora a lanzada desde a plataforma www.change.org, onde, segundo explican os veciños, «ao buscar por Bueu na páxina aparece a petición lanzada por A lona da vergoña, que é o nome que ten a campaña iniciada polas 19 familias do edificio Pintos». Ata onte pola noite a petición acumulaba case 600 firmas de solidariedade.
