A entrada dunha baixa atlántica que se situará sobre o Cantábrico a partir deste mércores vai provocar un descenso xeneralizado das temperaturas na Península, mentres que a cota de neve baixará aos 300 metros, segundo a Axencia Estatal de Meteoroloxía (Aemet).
Deste xeito, entre este martes e o mércores, a chegada dunha baixa atlántica situada ao noroeste de Irlanda e que se irá desprazando cara ao sur, colocándose sobre o Mar Cantábrico precedida dunha nova fronte, afectará a toda a Península e Baleares de xeito progresivo ao longo dos próximos dous días.
En concreto, para este mércores espérase un descenso térmico xeneralizado, do que se librará a área mediterránea e o cantábrico oriental. Unha caída das temperaturas que se prolongará durante o xoves, un día no que as xeadas serán as protagonistas na metade norte, zonas da meseta Sur e serras do sueste. Así mesmo, a aproximación da baixa atlántica provocará durante ambos os días a entrada de ventos de compoñente oeste, que soprarán con intervalos de intensidade forte no litoral galego e cantábrico e a Cordilleira Cantábrica.
Recoméndase extremar as precaucións na estrada
GALICIA. En canto á comunidade galega, a dirección xeral de Protección Civil e Urxencias do Ministerio do Interior, de acordo coas predicións da Aemet, alerta por nevadas e temporal marítimo.
As nevadas serán máis intensas espéranse a partir dos 500 metros de altitude, aínda que tamén poderán producirse en cotas por encima de 300. Espérase que as nevadas afecten tamén durante os próximo días a outras zonas do norte peninsular por encima dos 500 metros.
Ademais, en canto ao temporal marítimo, poderían producir ondas de entre cinco e seis metros de altura nas costas da Coruña.
PRECAUCIÓN. Ante a previsión de neve, Protección Civil recomenda que, se é imprescindible viaxar por estrada, hai que ir moi atento e ter especial coidado coas placas de xeo, informarse da situación meteorolóxica e do estado das estradas, extremar as precaucións, revisar o vehículo e atender as recomendacións de Tráfico. Aconsella ademais revisar os pneumáticos, anticongelante e freos, ter a precaución de encher o depósito da gasolina e levar pneumáticos de inverno ou cadeas, así como roupa de abrigo e un teléfono móbil con batería de recambio e/ou cargador de automóbil. En caso de estar atrapado na neve, aconséllase permanecer no coche, coa calefacción posta, renovando cada certo tempo o aire, e vixiar que o tubo de escape non estea obstruido para evitar que os gases penetren no interior do vehículo, entre outros consellos.
Ante ventos na costa, recomenda que, se se atopa en zonas marítimas, hai que procurar afastarse da praia e doutros lugares baixos que poidan ser afectados polas elevadas mareas e ondadas que adoitan xerarse ante a intensidade de ventos fortes; non pór en risco a vida por intentar captar imaxes espectaculares e pide evitar estacionar os vehículos en zonas que poidan verse afectadas a ondada.
