O presidente da Generalitat, Carles Puigdemont, anunciou que nos próximos días "trasladará" ao Parlament os resultados da votación do 1-O, para que, se o si á independencia é maioritario, aplique o procedemento previsto na lei do referendo para proclamar a independencia.
Nunha declaración institucional no Palau da Generalitat, arroupado polos consellers do seu Goberno, Puigdemont destacou que Cataluña conseguiu celebrar o referendo que o Estado se esforzou tanto en impedir" e fixo unha "apelación directa" á Unión Europea a que, ante a "intransigencia e a represión" do Estado, asuma que a cuestión catalá "xa non é un asunto interno" de España senón un "asunto de interese europeo".
"Os cataláns gañámonos o dereito a ser respectados en Europa. A Unión Europea xa non pode continuar mirando cara a outro lado. Somos cidadáns europeos os que sufrimos a vulneración de dereitos e liberdades, violacións directas da carta europea dos dereitos fundamentais", afirmou.
Segundo Puigdemont, os "valores fundacionais" da Unión Europea "están en perigo polos abusos dun Estado que se comporta de xeito autoritario", polo que fai falta que "actúe con rapidez para manter a autoridade moral dentro e fóra do continente".
Carles Puigdemont: "Os cidadáns de Cataluña gañamos o dereito a ter un Estado independente que se constitúa en forma de república"
Puigdemont destacou que este domingo Cataluña "gañou moitos referendos" e os cataláns gañáronse o dereito a ser escoitados, a ser respectados e a ser recoñecidos".
A mensaxe que trasladaron "ao mundo os millóns de persoas mobilizadas", dixo, é que os cataláns teñen "dereito a decidir" o seu futuro e queren "vivir en paz, sen violencia e fóra dun Estado que é incapaz de propor unha soa razón convincente que non sexa a imposición e o uso da forza bruta".
"Os cidadáns de Cataluña gañámonos o dereito a ter un Estado independente que se constitúa en forma de república. En consecuencia, o Govern que presido trasladará nos próximos días ao Parlamento de Cataluña, sede e expresión da soberanía do noso pobo, os resultados da xornada de hoxe para que actúe de acordo co previsto na Lei de Referendo", afirmou.
Segundo o artigo 4.4 da lei de referendo, aprobada polo Parlament e suspendida polo Tribunal Constitucional, se o si á independencia sae vencedor, o Parlament, "dentro dos dous días seguintes á proclamación dos resultados por parte da sindicatura electoral, celebrará unha sesión ordinaria para efectuar a declaración formal da independencia de Cataluña".
Segundo Puigdemont, Cataluña gañouse con suor a súa soberanía e todo o respecto" e manifestou o seu "agradecemento" a "todos os que este domingo fixeron posible a vitoria da democracia por encima da violencia", así como aos "primeiros ministros e presidentes de goberno da Europa democrática que fixeron chegar mensaxes de preocupación" e ás "decenas de parlamentarios" de diferentes países que expresaron a súa "indignación pola represión brutal desatada polo goberno que preside Mariano Rajoy".
Tamén se referiu aos preto de 800 feridos como consecuencia da que cualificou de "brutalidade policial", vítimas, dixo, de "vexacións e claras violacións dos dereitos humanos que non poden quedar impunes".
Puigdemont denunciou que "o Estado escribiu este domingo unha páxina vergoñosa na súa historia de relación con Cataluña" e engadiu: "Ata cando? Hoxe dixemos que isto xa se acabou". "O camiño que habemos de percorrer a partir de agora habémolo de facer xuntos", dixo Puigdemont, que se mostrou aberto a "propostas de diálogo que sirvan para respectar a vontade dos cataláns" e ás "ofertas de mediación que cheguen".
