O estado no que se atopa un tramo do viario do lugar da Costiña, na parroquia de Vilalonga, é motivo de preocupación de numerosos residentes. Ademais da situación actual do pavimento, os veciños temen que o muro dunha parcela da zona acabe por vir abaixo.
A principal traba á hora de pór solución a esta situación radica en que a titularidade da parcela non está do todo clara. Segundo explican fontes consultadas, os terreos forman parte do Chan Urbanizable número 10, que no seu momento foi propiedade dunha promotora. Con todo, esa firma xa non existe e a parcela pasou a mans de Novagalicia Banco e, posteriormente, ao Sareb. Este feito fai que os veciños non saiban a quen acudir para solicitar unha reforma do muro, xa que, tal e como apuntan, «en calquera intre poder caer abaixo. Nalgunhas partes xa está practicamente derruído. A situación é perigosa, porque por esa estrada circulan moitos coches e o espazo para os peóns é moi reducido».
Non é a primeira vez que os residentes na zona se fan eco desta situación. Un deles remitiu un escrito ao Concello de Sanxenxo a finais do ano 2012, no que solicitaba que se emendasen os «graves problemas e deficiencias» que presenta non só este viario, senón tamén outro camiño situado no lugar da Tomada, preto da urbanización do Revel. Os veciños aseguran que a Administración non deu resposta a esta solicitude, polo que sospeitan que o Concello non ten potestade para poder actuar. «Pero tampouco sabemos a quen pedir axuda se a parcela pertence ao Sareb».
Ademais do mal estado do polémico muro, os residentes fan fincapé na necesidade de instalar máis puntos de luz e renovar a capa de rodaxe do firme. Así mesmo, a ausencia de canalizacións provoca inundamientos puntuais da calzada, sobre todo durante o inverno. Esta situación repetiuse en varias ocasións ao longo dos últimos meses.
