O inicio do outono é sinónimo de festa e devoción en Poio. Un ano máis, centenares de fieis deixaron claro que cubrir quilómetros a pé en plena noite é un esforzo que están dispostos a cumprir para honrar á Virxe da Mercé. Nesta emblemática procesión non só toman parte residentes na vila, senón tamén veciños de Marín, cumprindo así cunha tradición que se remonta a tempos inmemoriais.
Aínda que en anos pretéritos houbo que desafiar á choiva, nesta ocasión as condicións meteorolóxicas acompañaron aos camiñantes, que, como é habitual, partiron desde tres puntos diferentes. O groso da comitiva iniciou a procesión ás 22.00 horas desde as inmediacións do centro sanitario da Mercé, na parroquia de San Salvador. Ao mesmo tempo, numerosos veciños facían o mesmo desde a igrexa de San Roque, en Combarro, e a capela da Virxe de Fátima, situada na localidade de Campelo. Tras percorrer varios quilómetros, as tres expedicións xuntáronse na Seara, onde se dirixiron cara ao Mosteiro de San Xoán, onde se celebrou a tradicional misa.
Unha vez finalizados os actos relixiosos tivo lugar unha verbena que estivo amenizada pola orquesta Televisión. A festa continuou ao longo da xornada deste domingo. Unha das grandes citas foi ás 19.00 horas, cando se celebrou a procesión polos claustros.
Quilómetros de devoción á Virxe da Mercé en Poio
Centenares de fieis tomaron parte este venres na procesión nocturna en honra á santa, unha das citas máis importantes do calendario festivo do municipio
