Rosa María Mateo, administradora única provisional da Corporación RTVE, pediu desculpas pola difusión a través da plataforma PLAYZ dun "tuit inadmisible sobre a primeira comparecencia da Princesa de Asturias".
Mateo asegura que "sente profundamente" a difusión deste tuit en PLAYZ, unha plataforma dixital de contidos audiovisuais interactivos e transmedia de RTVE.
No tuit hai unha montaxe de vídeo no que, nun primeiro momento, vese á Princesa Leonor lendo A Constitución e, a continuación, unha imaxe do expresidente de Estados Unidos, Barack Obama, tirando un micrófono ao chan.
Nun comunicado, Rosa María Mateo expresou as súas desculpas pola "interpretación a que pode conducir a súa visión" e lamentou que "desgraciadamente, moitos usuarios das redes sociais, entre os que tamén pode haber profesionais, non son conscientes do dano que se pode cometer a través delas".
Tras asegurar que sente un profundo respecto pola liberdade de expresión, Mateo subliña que "de igual xeito un medio de comunicación ten que respectar á súa vez ás institucións e á sociedade na que desenvolve o seu traballo".
Ante a imaxe difundida, PLAYZ manifestou pola súa banda que ese tuit non tivo ningunha intención de ofender nin ridiculizar. Segundo a plataforma, "moi ao contrario o mic drop (deixar caer o micrófono) é un xesto que na linguaxe dixital actual expresa que alguén acaba de ter unha gran intervención", polo que pide desculpas se se interpretou como algo ofensivo.
Mateo asegurou que entende a explicación da plataforma, pero reiterou que lamenta profundamente a difusión do citado tuit.
