O presidente da CEOE, Juan Rosell, valorou que a reforma laboral aprobada polo Goberno permita "clarificar" as causas obxectivas de despedimento para avanzar cara a que o despedimento improcedente quede como "unha anomalía, algo residual".
Nunha entrevista no diario El País, o presidente da patronal afirma que a reforma é positiva, vai en liña cos cambios que se fixeron en Europa e "introduce flexibilidade e estrutura un mercado laboral que era tremendamente ríxido". "Déixanos lonxe do radicalismo aplicado en Portugal e achéganos a Alemaña. Completa os pasos dados en 2010 e 2011 polo Goberno de Zapatero", apunta.
Rosell recoñece que é unha "reforma importante" pero nega que sexa a da patronal e reclama maior flexibilidade. "Non é o que fixese eu; pero o feito é importante. Non podemos pedir que se pase de primeira a quinta velocidade dunha"vez , apunta. No entanto, Rosell rexeita que a obsesión do empresario sexa despedir senón que o que buscan é contratar.
Para o presidente da CEOE, coa reforma alcanzouse "unha fórmula intermedia" que deixa aos axentes sociais un espazo moi grande para negociar e ante a que non ve "motivos suficientes" para a folga.
