A antiga Prisión Comarcal de Sarria converterase entre o 9 de setembro e o 22 de outubro na sala de exposicións dunha mostra formada por máis de 300 obras dun total de 70 artistas, pensada para resaltar "a riqueza" do Camiño de Santiago, grazas á colaboración da Deputación Provincial de Lugo con varios colectivos da zona vinculados, dun ou outro modo, á ruta xacobea.
Con esta exposición, que leva por título VIII Edición de Artistas e Artesáns da Comarca de Sarria non Camiño, o goberno da Deputación de Lugo "suma esforzos" coa Asociación de Amigos do Camiño da Comarca de Sarria, Palilleiras de Sarria, Sarricanta e Crearte para "pór en valor os recursos turísticos da provincia", dentro do Plan Estratéxico de Turismo da institución provincial.
O portavoz do goberno socialista e delegado de Relacións Institucionais, Álvaro Santos, asegurou que a Deputación de Lugo colabora "con esta iniciativa dentro" da súa "aposta" por facer visible "o traballo" dos artesáns e artistas lucenses, ademais de "pór en valor a nosa cultura popular e as nosas tradicións, como un dos grandes atractivos cos que conta a provincia".
"Na mostra, composta por trescentas obras duns 70 artistas da zona, poderán verse maquetas dos monumentos de Sarria, cadros, pezas en madeira, ferro ou tea, entre outros obxectos. Esperamos a chegada duns 5.000 visitantes", precisou.
A entrada será gratuíta e, como novidade, nesta edición os organizadores contan coa colaboración da Asociación Camiño Shikoku Henro, de Xapón, de modo que na mostra haberá un apartado dedicado só ás achegas dos seus membros.
