O ministro ucraíno do Interior en funcións, Arsén Avákov, denunciou hoxe o bloqueo por militares rusos dos aeroportos de Sebastopol e Simferopol, na república autónoma ucraína de Crimea, acción que cualificou de invasión "militar e ocupación".
"Dentro do aeroporto (de Sebastopol) hai militares e gardas de fronteiras de Ucraína. Pero fóra, militares con uniforme de camuflaxe e armados, sen distintivos, pero que non ocultan a súa pertenza" á Flota rusa do Mar Negro, escribiu Avákov na súa páxina de Facebook. Tal extremo foi negado con rotundidade desde Moscova
O titular interino de Interior precisou que efectivos da policía vixían o perímetro exterior do aeroporto, situado na cidade que acolle a base naval da Flota rusa do Mar Negro.
En Simferopol, capital da república autónoma, "119 militares con armas automáticas, uniforme de camuflaje e sen distintivos, chegaron ao aeroporto en varios camións, entraron no edificio e ocuparon o restaurante", denunciou Avákov.
"Non ocultan a súa pertenza ás forzas armadas da Federación de Rusia. A preguntas de efectivos do Ministerio ucraíno do Interior", que lles dixeron que son militares e que non teñen dereito a estar alí, "responden que non teñen instrucións de negociar" coa policía, agregou o ministro.
Avákov cualificou as accións como "a invasión armada e ocupación, e violación de todas as normas e convenios internacionais".
"É unha aberta provocación para desatar un conflito armado e derramar sangue. Xa non é competencia do Ministerio de Interior. Debe ocuparse o Consello de Seguridade Nacional e Defensa. Mentres non haxa choques armados, deben falar os diplomáticos", concluíu.
Horas antes de que tropas rusas chegasen ao aeroporto de Simferopol, un grupo armado prorruso irrompeu no mesmo recinto pero logo retirouse tras comprobar que non había tropas ucraínas na terminal.
Grupos armados similares tomaron onte as sedes do Parlamento e o Goberno de crimeano.
Tamén onte, o Lexislativo de Crimea aprobou a celebración dun referendo, o próximo 25 de maio -o mesmo día en que se celebrarán as eleccións presidenciais anticipadas ucraínas-, sobre a ampliación das competencias da república autónoma.
"¿Apoia vostede a autodeterminación de Crimea no seo de Ucraína sobre a base dos acordos e tratados internacionais?", reza a pregunta que se presentará á consulta popular.
Nesta rexión, duns dous millóns de habitantes, vive case un 60 por cento de rusos étnicos, un 25 por cento de ucraínos e un 12 por cento de tártaros.
Os rusos de Crimea acusan ás novas autoridades en Kiev de usurpar o poder ao depor ao presidente Víktor Yanukóvich e de querer imporlles a cultura ucraína.
Mentres, os tártaros defenden a unidade e integridade territorial de Ucraína e oponse á celebración do referendo.
Crimea, península bañada polo Mar Negro que acolle unha base naval rusa en Sebastopol, foi "regalada" en 1954, polo entón mandatario soviético, Nikita Jruschov, a Ucraína.
