A UE pecha as portas a Elnosa para a moratoria que pediu en Lourizán

Elnosa xa sabe que en ningún caso haberá moratoria para seguir utilizando mercurio na súa produción de cloro en Lourizán. A Dirección Xeral de Medio Ambiente da UE remitiu hai uns días á Xunta a súa taxativa contestación á solicitude tramitada pola empresa. Un non rotundo e o recordatorio de que o 11 de decembro é o último día que se permitirá producir cloro a base de mercurio, tal e como reza a directiva comunitaria 732, aprobada en 2013.

Así se lle trasladou o mércores ao comité de empresa por parte da Consellería de Medio Ambiente, quen ademais lles informou aos traballadores que segue pendente de que Elnosa autorice a publicación dos datos empresariais incluídos no expediente tramitado para a renovación da autorización ambiental integrada. Sen este permiso, a documentación non poderá someterse a información pública e ao obrigatorio prazo de alegacións. Ademais, a autorización xa non incluiría en ningún caso a moratoria solicitada.

A contestación de Bruxelas senta un precedente clarísimo para botar abaixo a moratoria que si concedeu o goberno cántabro á planta que Elnosa pretendía adquirir en Torrelavega e que está na mesma tesitura que a fábrica de Lourizán.

A contundencia da UE é total. Na súa misiva, o director xeral de Medio Ambiente, Daniel Calleja, asegura que non é posible activar prórroga algunha máis aló do 11 de decembro. E sinala que tampouco sería admisible a utilización de calquera técnica de produción que non poida ser considerada unha mellora técnica dispoñible (MTD) libre de mercurio, o que exclúe expresamente as celas de mercurio que utiliza a cloreira en Lourizán.

Bruxelas precisa que isto sería contrario ao establecido na directiva de emisións industriais". E indica tamén a necesidade de pasar a unha produción de cloro-alcalí, unha tecnoloxía denominada de membrana, "totalmente respectuosa co medio ambiente". Esa transformación do proceso produtivo implicaría unha retirada "total" do mercurio actualmente existente na fábrica de Pontevedra.

Elnosa solicitou a moratoria baseándose no artigo 15(4) da Directiva sobre as Emisións Industriais (DEI). Pero a Comisión Europea aclara que esta disposición "só é aplicable á obrigación de cumprir cos niveis de emisións asociados ás melloras técnicas", e "nunca" para as propias melloras técnicas esixidas.

Este mazazo da UE sobre as pretensións de Elnosa para continuar a súa actividade en Pontevedra podería resultar definitivo. En todo caso, de abrirse unha mínima posibilidade de prórroga para seguir producindo cloro con mercurio máis aló do 11 de decembro, a firma aínda tería que enfrontarse ás alegacións que o Concello de Pontevedra xa anunciou sobre a previsible autorización ambiental integrada que tramita a Xunta.

O mércores coñeceuse que esta tramitación tamén esta demorada e non precisamente pola Consellería de Medio Ambiente, senón pola falta de consentimento dos propietarios de Elnosa para someter todo o expediente ao necesario e preceptivo trámite de exposición pública.

Nas últimas horas, a Xunta de Galicia trasladou formalmente aos portavoces sindicais do persoal a situación actual na que se atopa a tramitación.