Dous mortos tras o ataque cun coitelo dun home en Finlandia

A policía finlandesa elevou este venres a dúas as vítimas mortais no ataque perpetrado por un home armado cun coitelo nunha céntrica praza da cidade de Turku (suroeste do país), que deixou feridas a outras sete persoas. A ministra de Interior, Paula Risikko, explicou que, polo momento, as forzas de seguridade non están a tratar o suceso como un ataque terrorista, aínda que advertiu de que a liña de investigación podería cambiar.

Así mesmo, engadiu que o atacante, detido tras recibir un tiro na perna, non foi aínda identificado pero "parece estranxeiro". Risikko indicou tamén que o centro de Turku volve ser considerado seguro.

Tras o ataque, as forzas de seguridade pediron á cidadanía que evitase o centro da cidade ante a confusión dos primeiros momentos e os axentes peitearon a zona en busca de posibles cómplices, un extremo que non se descartou aínda do todo.

A raíz do suceso, as autoridades finlandesas reforzaron a seguridade no aeroporto de Helsinqui-Vantaa e nas principais estacións de ferrocarril do país. Ademais, pediron a colaboración cidadá e facilitaron dous números de teléfono aos que poden chamar quen teñan calquera tipo de información sobre o suceso.

O primeiro ministro, Juha Sipilä, escribiu en Twitter que o seu Goberno segue de cerca os acontecementos e a operación policial despregada en Turku, así como anunciou que o Executivo manterá unha reunión de urxencia este venres pola tarde.

Risikko explicou que o presidente finlandés, Sauli Niinisto, está de camiño a Turku para informarse de primeira man sobre o sucedido.