O patrón da embarcación pesqueira ‘Mar Aberto' tivo que ser evacuado na madrugada de onte ao porto de Marín tras resultar ferido con queimaduras no propio barco cando manipulaba un tapón do depósito de gasóleo.
O suceso tivo lugar no mar, sobre as 3.50 horas, e foi unha ambulancia medicalizada do Servizo 061 a que levou ao ferido, J.G.D., de 38 anos e veciño de Marín, ao hospital vigués de Povisa con queimaduras nun brazo, no pescozo e nas costas.
A embarcación atopábase faenando a unhas tres millas da zona de Areas, en Sanxenxo, cando o mariñeiro sufriu o accidente mentres se atopaba na zona do motor do barco.
Segundo declararon testemuñas presenciais aos achegados do ferido, no pesqueiro atopábanse este e outro mariñeiro, manifestando este último que nun momento dado, no motor salto unha alarma (testemuña de temperatura), polo que o patrón baixou á zona do motor para tratar de emendar a incidencia. Nese momento e tras varias comprobacións mecánicas, dispúxose a abrir a tapa do depósito do líquido refrigerante. Foi entón cando se produciu unha pulverización do líquido a alta temperatura cara ao seu corpo, queimándolle parte das costas, o brazo dereito e a parte dereita do pescozo. Estas queimaduras afectáronlle a un 22 % do corpo. Tras o ocorrido pediu auxilio ás outras embarcacións que faenaban na zona, sendo evacuado o ferido polo barco Novo Rio Sur. No porto de Marín desprazouse en apoio unha patrulla do Corpo Nacional de Policía, a Policía Portuaria, un compoñente do servizo fiscal da Garda Civil do Porto, varios mariñeiros, o pai e o cuñado do ferido.
CICLISTA FERIDO
Doutra banda, un ciclista de Marín tamén resultou ferido na noite do xoves tras ser atropelado por un vehículo na Avenida de Ourense.
O sinistro tivo lugar pasadas as 21.00 horas cando o home, duns 30 anos de idade, circulaba polo viario. Segundo indicaron fontes da Policía Local, o ciclista «non levaba casco e ía sen luces e sen ningún tipo de medida de sinalización» que puidese alertar ao condutor do vehículo da súa presenza na estrada. O Servizo 112 de Galicia, tras recibir a alerta dun particular achega do incidente, deu aviso do mesmo a Urxencias Sanitarias, que confirmou a gravidade do ciclista ferido. As fontes policiais confirmaron, no entanto, que as feridas se limitaban a unha «fractura de clavícula». O suceso produciuse na Avenida de Ourense, na intersección deste viario coa rúa Vidal Pazos.
As fontes policiais non puideron concretar se foi o condutor do coche, un home duns 30 anos de idade, o responsable do incidente ou se foi o ciclista quen realizou unha manobra inapropiada, que acabaría ocasionando o accidente. O ferido foi trasladado ao Hospital Montecelo, onde recibiu atención médica debido á fractura.
O pescador, de 38 anos de idade e veciño de Marín, foi trasladado a Povisa polas feridas que sufriu nun brazo e nas costas
O ciclista circulaba pola Avenida de Ourense sen casco e sen luces nin outras medidas de seguridade, indicou a Policía Local
