A primeira xornada do inicio da tempada de pesca de salmón no río Lérez serviu para recoñecer a quen foi un dos protagonistas do coto de Monte Porreiro no ano 2015, Miguel Ángel Chamadoira, o pescador que conseguiu atrapar ao rei do Lérez hai xusto dous anos, o 2 de maio de 2015, ao redor das nove da noite. Aquel día sacou das augas do río un salmón de 75 centímetros de lonxitude e 4,320 quilogramos de peso.
Con todo, este ano non poderá repetir o tan ansiado trofeo. Acompañado doutros afeccionados á pesca, Chamaidora foi un dos privilexiados que conseguiron un permiso para o primeiro día nunha tempada que non pinta moi ben. "En principio pinta bastante mal. O río ten pouca auga e ven poucos peixes. Son optimista sempre, hai que intentalo. Se este ano hai sorte, veremos se o podemos sacar", afirmaba ás 9.40 horas do luns.
"O salmón é un peixe que con pouca auga queda abaixo e hai que esperar á subida do río para poder pescar un"
O seu imán para atraer ao rei puido repetirse tamén o ano pasado cando acompañaba a outro compañeiro. As crónicas daquela data apuntan que estaba a pescar con cebo e culleriña xunto a José Ángel Pérez cando un salmón picou o anzol. Con todo, "tras un momento de loita, o peixe logrou escapar, deixando a ambos os cañistas sen o premio final" (Diario de Pontevedra, 7 de maio de 2016).
Este delineante de profesión, que traballa no sector da construción, ten tamén os seus propios hábitos. "Nós pescamos con cebo natural con quisquilla, pero tamén me gusta pescar con mosca", comentaba Chamadoira o luns, aínda que recoñece que "con pouca auga, con culleriña pode ser máis efectivo".
Miguel sabe que "o salmón é un peixe que con pouca auga queda abaixo e hai que esperar a subida do río", informaba en canto ás opcións de pescar un no coto pontevedrés.
