Unanimidade na Mesa Segunda do Parlamento de Galicia para condenar a situación que está a atravesar a obra da N-541 á altura do quilómetro 82, entre Tenorio e Viascón, tras a paralización dos traballos de reconstrución da ponte sobre o río que se derrubou en tras as riadas de 2006 e que posteriormente volveu esborrallarse cando xa se iniciou o traballo de reparación do mesmo.
A instancias do Concello de Cotobade, o Grupo Popular, encabezado polo deputado pontevedrés Jacobo Moreira e do seu homólogo Alejandro Gómez levou unha proposición pola que se solicitará ao Goberno Galego a que se dirixa ao Ministerio de Fomento instándolle a retomar de inmediato os traballos, que levan paralizados desde fai máis dun ano e a dar unha solución definitiva á situación desta ponte para evitar un terceiro derrubamento.
Así mesmo, piden unha sinalización -diúrna e nocturna- adecuada para os perigos que supón a provisionalidade destas obras desde a súa última paralización, para evitar accidentes. Segundo apuntou o propio Jacobo Moreira onte, ''este foi o único punto de desacordo, xa que os deputados do PSOE pedían que se retirase esta petición ao entender que a sinalización é a correcta, pero non se aceptou e votaron a favor de todos os modos''.
''Desde o ano 2006''
A sinopsis da situación que prepararon os parlamentarios pontevedreses botou man do termo acuñado popularmente en Cotobade para as obras da ponte, que non se finalizaron desde o ano 2006 pois xa naquel entón deuse unha solución parcial ao problema. O cualificativo ''o burato da vergoña'' xa empezou a ser usado polos veciños da zona hai un ano, e incluso foi usado polo entón alcalde de Cotobade, o socialista Manoel Loureiro, para queixarse publicamente da situación ante o Ministerio de Fomento.
Os 'populares' tamén consideran que o termo se axusta á realidade das obras. Como recorda a proposición, ''hai dous anos produciuse o afundimento da estrada N-541 no punto quilométrico 82. Este afundimento, causado por un corremento de terras deixou como resultado un burato de 20 metros que cortaba a estrada e resultaba infranqueable'', relatan.
Non era a primeira vez que o viario se esborrallaba, pois as riadas de outubro de 2006 conseguiran o mesmo efecto, ao estar a ponte construído sobre canalizacións de amálgama que non soportaron as filtracións de auga e cederon. Máis dunha semana, tardouse en restituír o tráfico na zona.
Tras iniciar as obras de reparación urxentes, Fomento deu luz verde aos traballos de reconstrución de todo o tramo, cos que se pretendía construír unha nova ponte con alicerces de formigón que evitase novos desprendementos. Estes traballos eran os que estaban en marcha en 2006 cando se produciu a nova focha. Poucos meses despois, por causas atribuíbles á crise, a empresa construtora paralizou os traballos e, a pesar da presión para recuperar a actividade, ao final Fomento tivo que denunciar o contrato.
Durante o proceso de tramitación da nova licitación foi cando se perderon as noticias do Ministerio de Fomento. O novo alcalde de Cotobade, Jorge Cubela, xa fixo un intento en Madrid de expor a urxente situación deste tramo dun viario nacional cunha alta densidade e decidiu recorrer á Xunta ante a falta de resposta do Goberno central.
O grupo parlamentario recorda que o descontento sobre este viario levou incluso á convocatoria dunha manifestación, o pasado 1 de maio.
