Miles de persoas que practican deporte habitualmente non son noticia, pero son un sector cada día máis importante da sociedade que reclama atención. Juan Antonio Lijó e David de María así o entenderon, e por iso decidiron organizar unha feira sen referencias anteriores en Galicia. Chámase Moving e celebrarase en Vilagarcía, os días 15, 16 e 17.
"É unha feira para vir en chándal", apunta Lijó. Serán 35 actividades relacionadas co deporte, o lecer, o turismo e o aire libre, as que terán cabida no recinto feiral de Fexdega. É unha invitación destinada non só a deportistas, senón a todos os que estean interesados en levar unha vida sa e atopar novos alicientes para as súas horas de lecer.
Oferta. Os promotores desta actividade esperan reunir a 2.500 deportistas vinculados ás actividades que se ofrecen e a unhas 6.000 persoas que poderían desprazarse ata Vilagarcía para coñecer a ampla oferta de Moving, en cuxo programa tamén figuran conferencias que van incluídas no programa, demostracións ou exposicións, entre as que destacan os barcos nos que os olímpicos arousáns lograron os seus éxitos.
A entrada custará tres euros, e por ese prezo poderase participar en boa parte das actividades que ofrece. Os menores de 14 anos non terán que pasar por despacho de billetes, e pódese obter un bono por seis euros que dá dereito a participar os tres días. As actividades que hai que pagar terán unha rebaixa do 40% en relación co prezo de mercado.
A oferta é moi ampla e abarca desde actividades en bicicleta a sendeirismo, paintball, capoeira, paseos pola illa de Cortegada, fitness, skate, fly-board, running, fisioterapia, nutrición, mostras de fotografía submarina, canicros bautizos de mar, ou circuítos de karts, no recinto de Fexdega, no exterior e na zona portuaria, ao que haberá que engadir os espazos naturais polos que discorrerán as actividades ao aire libre.
Moving marcará un rexistro inédito na historia do recinto feiral, porque ocupará unha superficie de 10.000 metros cadrados: 5.000 do pavillón cuberto e o resto no exterior de Fexdega, onde estará situada unha tirolina de 130 metros de altura.
A feira enmárcase nunhas datas nas que Vilagarcía se converte, un ano máis, na capital do deporte galego, coa celebración da Copa de España de Optimist, o campionato de tenis de mesa, o memorial Miguel Ángel González, o Arousa Fútbol 7 ou o Vilagarcía Basket Cup, competicións en catro modalidades deportivas que, en moitos casos, celébranse en Vilagarcía desde hai anos e que, noutros, nacen coa intención de permanecer no tempo. A todo iso súmase a Gala do Deporte galego, que se celebrará no auditorio o 9 deste mes.
