viernes. 26.02.2021 |
El tiempo
viernes. 26.02.2021
El tiempo

Verbenas, deporte e tradición xúntanse nas Festas de Cantodarea

La orquesta París de Noia estará presente en las Festas de Cantodarea el próximo 29 de abril
La orquesta París de Noia estará presente en las Festas de Cantodarea el próximo 29 de abril
A comisión organizadora ultima os preparativos do evento cunha variada programación

A parroquia marinense de Cantodarea vivirá proximamente unhas das Festas de San Xosé Obreiro máis atractivas das últimas décadas, que se celebrarán entre os días 29 de abril e 1 de maio e contarán coa actuación das principais orquestras de Galicia, ademais dun amplo e variado programa de actividades.

A comisión organizadora do evento, cuxas verbenas xa están totalmente pechadas, realizou ao longo desta semana as tarefas de recadar os fondos necesarios para facer fronte a un elevado orzamento, xa que fai unha aposta moi potente para contar con varias das agrupacións musicais con máis tirón no que a verbenas se refire.

PROGRAMACIÓN. O programa festivo abrirase o venres 29 de abril, ás 19.30 horas, cunha gran tirada de fogos e uns pasarrúas a cargo do grupo ‘Pousos da Area’ e a comparsa ‘A Vacapinta’. Ademais, pola noite iniciaranse as verbenas destas festas coa actuación da orquestra París de Noia e a Festa Kyoto FM, protagonizada por DJ, cantantes, bailaríns e moitas outras sorpresas que a emisora de radio do mesmo nome ten preparadas para esta cita nocturna.

Ao día seguinte, ás 11.30 horas o Parque Azul acollerá unha exhibición de diferentes modalidades deportivas como skate, BMX, scooter e '‘flatland'’. A continuación, ás 12.30 horas, os bares da parroquia marinense serán invadidos pola música de taberna coas actuacións musicais de: Son das Ondas, Cantores Tradicionais, Brisas de Bouzas, Os Saljariteiros, Pousos da Area e Fentos e Frouma.

As exhibicións deportivas continuarán pola tarde no Parque Azul co certame Cantodarea Skate Contest no que decenas de mozos amantes dos deportes urbanos competirián nas categorías Sub18 e Open.

As orquestras Panorama, París de Noia e Marbella serán os pratos fortes dos festexos da parroquia marinense

Ao mesmo tempo, durante a tarde terán lugar na Praza do Regueiro diversas actividades lúdicas para os máis pequenos, como por exemplo carreiras de sacos, talleres de pintura ou a III Carreira Internacional de Triciclos.

A nota musical porana pola noite as orquestras Televisión e Tokio. O domingo, a programación festiva incluirá diferentes pasarrúas a cargo de varias agrupacións folclóricas da vila e, ás 16.30 horas, celebrarase no Parque Azul o IV Torneo de Billarda San Xosé.

Aínda que o protagonismo principal da xornada terano os actos litúrxicos. Por unha banda, ás 12.00 horas a igrexa parroquial acollerá a tradicional misa solemne en honra ao patrón das festas e, xa pola tarde, ás 19.00 horas, terá lugar polas rúas da parroquia marinense a procesión de San Xosé Obreiro.

Pola noite será a quenda de gozar bailando coas actuacións das orquestras Marbella e Costa Blanca. O broche de ouro a un programa de auténtico luxo para a parroquia e para o municipio, porao o luns 1 de maio a orquestra Panorama, que estreará un novo espectáculo. Nesta ocasión, estará acompañada pola orquestra Jerusalén, unha formación cun importante tirón entre os amantes das verbenas.

A comisión organizadora resalta que se trata dunha programación moi ambiciosa e que supón ter que reunir un importante orzamento, polo que apela á colaboración dos veciños, así como de empresas e casas comerciais, para facer viables estes tradicionais festexos.

Verbenas, deporte e tradición xúntanse nas Festas de Cantodarea
comentarios
ç