A rúa Jaime Janer rexistrou este martes, á altura do número 169, un accidente de tráfico que se saldou con tres persoas feridas e con cinco vehículos implicados, tres dos cales estaban estacionados e dous circulaban pola vía.
Os feitos sucederon cando o condutor dun Mercedes gris, D.M.S., de 66 anos, que circulaba por Jaime Janer en dirección Moaña, perdeu o control do seu vehículo por causas que se están investigando e impactou contra tres coches que estaban estacionados na marxe dereita da vía, provocándolles danos de diversa consideración. Acto seguido, o vehículo invadiu o carril contrario e chocou contra unha furgoneta propiedade do Concello de Marín que circulaba en dirección ao centro da vila. Nela viaxaban J.B.P, capataz de obras e condutor do vehículo, e F.S.B.B., enxeñeiro municipal e sentado no asento do copiloto.
Os tres feridos foron trasladados en ambulancia ao Hospital Miguel Domínguez de Pontevedra. Na parte traseira do Mercedes tamén viaxaba un can propiedade do condutor, que ía atado, e do que se fixeron cargo uns veciños da zona que coñecían ao seu propietario.
Polo momento descoñécense as causas do accidente, que se produciu logo dunha curva pronunciada cara á esquerda. Tras o suceso, a Policía Local redirixiu o tráfico procedente de Moaña pola estrada de Figueirido, Camiño da Raña e rúa San Pedro e controlou a circulación procedente do centro urbano.
