O centro de formación Aixola colaborou nos últimos meses cos mariscadores da confraría de pescadores de San Andrés de Lourizán na reparación dunha embarcación empregada polos profesionais do marisqueo para devolver ao mar os excedentes de capturas rexistradas a pé.
Os traballos de restauración deron comezo a mediados do pasado mes de agosto nas instalacións do centro, no Porto de Marín. Alí, profesorado e alumnado dos cursos de Laminado manual en poliéster para pezas de acuicultura e construción naval e de Mecánica básica de motores en embarcacións menores estudaron as partes deterioradas para corrixir as deficiencias.
Un total de 350 mariscadores utilizan a Sementeira, que se deteriorou co uso e que se entregou hai uns días tras a súa renovación. As reparacións consistiron na limpeza, lixado, revisión, comprobación de todas as pezas e pintado, entre outras tarefas, por parte do equipo de Aixola, ao que precisamente a confraría encomendou a tarefa pola ampla experiencia do centro neste ámbito.
