Unha gran nube de fume causou este martes pola tarde alarma entre a cidadanía marinense. O incendio produciuse nun solar abandonado no lugar das Raposeiras, á beira da antiga nave de Metal Marín, un inmoble que actualmente se atopa en estado de abandono.
Segundo explicou a Policía Local, unhas persoas, que ao parecer son ocupas deste inmoble, prenderon lume a distintos materiais ao redor das sete e media da tarde. As lapas descontroláronse e foi necesaria a intervención dos Bombeiros de Pontevedra, que acudiron rapidamente ao lugar dos feitos a sufocalas.
Así, o incendio foi controlado en apenas unha hora, pero foi necesario que os bombeiros permanecesen no solar máis tempo arrefriando os materiais calcinados. Ao redor das 21.00 horas os Bombeiros do Morrazo fixéronse cargo e completaron a actuación.
Finalmente, todo quedou nun susto e non houbo que lamentar danos persoais. A Policía Local explicou que os materiais queimados consistiron en distintos cables, restos de obra, chatarra, cobre e plástico.
A pesar de que a superficie afectada polo lume non foi de grandes dimensións, a intensa fumareda
podía verse desde o centro urbano da vila marinense, o que causou alarma entre a cidadanía. Así mesmo, este suceso provocou preocupación entre os veciños da zona, que temen que se poida volver producir un incidente similar.
