O aumento da demanda de prazas no CEP Sequelo de Marín deixou fóra do centro escolar un total de catro alumnos para o primeiro curso de primaria. Entre eles os fillos de Amelia Davila, que reside a tan só 150 metros do colexio, e de Rubén Díaz, que ten o seu domicilio a 200 metros.
A CEP Sequelo é un centro escolar de liña un (25 alumnos por curso, fóra de quinto e sexto) desde hai seis anos. Con todo, coa recuperación dalgúns servizos como o plan madruga ou o comedor escolar, a Anpa do colexio sinala que a demanda aumentou e solicitan que se converta de novo nun centro de liña dúas, o que suporía ademais un menor número de alumnos por clase e menor contacto fronte á covid-19.
Davila foi a primeira en dar o paso ante Educación e enviar un escrito fronte ás complicacións que lle supón que o seu fillo sexa derivado ao CEIP Carballal, a aproximadamente 1,3 quilómetros do seu centro de preferencia.
A pesar de que a CEP Sequelo non é o centro que lle correspondería á escola infantil á que asistiu o menor anteriormente, a afectada explica que "o Carballal queda moito máis lonxe e o camiño é máis difícil. Teño máis problemas para conciliar". Ademais, sinala que "a miña persoa de apoio para conciliar é a miña nai" e que o horario do centro ao que foi derivado, cunha hora de entrada máis tardía, cáusalle moitos máis problemas para conciliar.
A dificultade do camiño é tamén un dos aspectos que destaca outro pai afectado, Rubén Díaz, a tan só 200 metros do centro. De recibir praza no Sequelo "o neno iría só andando e, deste xeito, tería que subir pola costa do cemiterio, con tramos sen beirarrúas e sen dereito a autobús", explica.
O traxecto andando ata o CEIP Carballal desde a zona da CEP Sequelo é de 1,2 quilómetros polo camiño que Díaz indica, e de 1,3 polo outro traxecto posible. Ambos supoñen unha camiñada de aproximadamente 18 minutos e para obter o dereito a autobús, segundo a normativa da Xunta, ten sempre preferencia o alumnado que reside a máis de dous quilómetros de distancia.
As familias afectadas e a Anpa do colexio demandan que se abra unha segunda liña con 15 alumnos en cada aula
Ante a situación, e en apoio ás familias afectadas, o Anpa Aidón da CEP Sequelo decidiu presentar esta semana unha reclamación dirixida ao inspector escolar solicitando unha segunda liña para o centro que lle daría solución ao exceso de demanda.
No seu escrito apelan ao gasto que supón o desprazamento de varios quilómetros ou "o gasto económico de compra de uniformes se se tratase de centros concertados, prexudicando a conciliación da vida familiar coa economía da mesma", sinalan.
Neste aspecto, consideran inxusta a diferenza na oferta de prazas entre os colexios públicos e concertados de Marín. Estes últimos, de liña dúas, con dúas aulas por curso, ofertan un total de 50 novas matrículas, mentres que os colexios públicos de liña un, como a CEP Sequelo desde hai seis anos, permiten tan só 25 novos alumnos.
Unha cifra que desde a asociación sinalan que aumenta no caso dos concertados co número extra que se ofertan no colexio Sagrado Corazón que, a pesar de pertencer ao termo municipal de Pontevedra, é unha opción escollida por moitas familias pola proximidade á que se atopa da vila marinense.
As familias afectadas e a Anpa do colexio demandan que se abra unha segunda liña no centro con 15 alumnos en cada aula. Unha solución que consideran adecuada dadas as circunstancias ocasionadas pola covid-19 contra a que consideran unha mellor opción contar con menos nenos por clase. Este desdobre daría cabida aos 29 nenos en lista de espera por unha praza neste centro.
A Anpa traballa tamén noutra reclamación en relación co EEI O Grupo, onde sinalan hai tamén unha falta de prazas.
Así, especifican que dos 29 alumnos que solicitaron praza para entrar na CEP Sequelo, catro procedían doutros centros e que, ante a existencia de prazas no colexio ao que están adscritos, o CEIP Carballal, o desdobre non está xustificado.
