A Oficina do Área de Rehabilitación Integral (ARI) do Concello leva xestionados preto de 3 millóns de euros en investimento privado e máis dun millón de investimento público destinados á rehabilitación e urbanización no centro urbano de Marín. Ivana Conte, encargada do departamento, e Manuel Santos, concelleiro de Urbanismo e Facenda, reuníronse esta semana para realizar un balance das actuacións levadas a cabo pola Oficina no municipio.
Neste momento está a desenvolverse a cuarta fase de actuacións de rehabilitación no ámbito do ARI de Marín correspondentes co Plan Estatal de Vivenda 2018-2021. Desde o 2019 ata agora xa leva executado case o 50% das obras que se presentaron á convocatoria de axudas, o que supón un investimento no último ano de 273.000 euros en obras en edificios de uso residencial. O 50% dese importe está financiado a través do plan.
OBXECTIVO. Para o 2021 e o 2022, o obxectivo marcado polo ARI é executar o 50% restante das obras que entraban dentro da convocatoria, chegando así aos 600.000 euros de investimento privado. Con respecto á pública, está previsto contar cunha axuda de 100.000 euros para obras de urbanización de iniciativa municipal.
Durante a reunión de traballo, o Concello e o ARI anunciaron que a semana pasada o BOE publicou un real decreto que permite que se prorroguen as vixencias dalgunhas fases de actuación que estaba previsto que terminasen o 31 de decembro. Deste xeito, o Goberno local terá a oportunidade de publicar unha nova convocatoria no ano 2021 cos remanentes que quedaron dalgunhas fases, "dando así resposta á crecente demanda rexistrada na oficina ARI", explica Ivana Conte. A axuda para obras de rehabilitación de 2022 poderían alcanzar os 300.000 euros.
Desde 2012 ata agora, o investimento total no ámbito privado do ARI foi de 1.356.110,90 euros en 279 vivendas, cunha achega pública de 551.483,41 euros. De face a 2022, a previsión é alcanzar as 400 vivendas en total, conseguindo polo tanto un investimento xeral de 1.856.110,90 euros no ámbito ARI.
O concelleiro Manuel Santos asegurou que "é un moi bo balance e dá conta do bo funcionamento da oficina e da enorme intención da veciñanza de rehabilitar e mellorar as súas vivendas, o que ao final redunda nunha mellora colectiva en todo o espazo urbano".
Máis aló do ARI, no Concello de Marín realizáronse varias intervencións que contaron con axudas públicas da Xunta de Galicia nos anos 2018, 2019 e 2020. A Oficina, en coordinación con particulares e xestorías de comunidades de propietarios, alcanzaron axudas públicas de máis de 500.000 euros, cun investimento privado total de 1.500.000 euros nos tres anos.
Con respecto ao tipo de intervencións que levan a cabo nos edificios e nas vivendas é moi similar en todo o ámbito municipal, centrándose na mellora da eficiencia enerxética, accesibilidade e conservación.
