Os armadores recorren a lei que obriga aos pescadores a fichar

A Federación Nacional de Confrarías de Pescadores, a Unión Nacional de Cooperativas do Mar e a Confederación Española de Pesca (Cepesca) anunciaron onte que recorrerán o Real Decreto Lei do pasado 8 de marzo que regula o rexistro horario. E é que a pesar das reiteradas solicitudes do sector pesqueiro ao Ministerio de Traballo, Migracións e Seguridade Social para que considerase á pesca excluída da súa aplicación, o departamento estatal pronunciouse en contra das súas peticións e comunicou ás distintas asociacións que a tripulación dos barcos pesqueiros terán tamén a obrigación de fichar.

Tras este anuncio, os armadores marinenses situáronse en contra. "Non ten sentido, é totalmente absurdo", comenta un empresario da vila morracense. "A flota así non pode traballar", insiste.

E é que as confrarías, os pescadores e os armadores pregúntanse como facelo, xa que na pesca artesanal non se cobra por horas senón por capturas. Ademais, a xornada de traballo é allea á facultade de dirección da empresa e incluso do patrón, xa que só hai traballo se hai pesca. Así mesmo, os traballadores deste sector están todo o tempo no centro de traballo (no barco), pero non están a faenar todo o tempo, por exemplo, ou que existen moitas normativas diferentes en toda España que establecen os horarios de pesca de cada modalidade.

Ademais, os armadores aseguran que cada día teñen un horario diferente e que as condicións climatolóxicas ás veces impídenlles saír a faenar, entre outras cuestións.

O secretario xeral de Cepesca, Javier Garat, recibiu a noticia con incredulidade. Así, Garat subliñou que é unha medida de control "completamente inviable". E é que, no caso de ter que fichar, a tripulación dos barcos pesqueiros tampouco sabería como facelo.

"É que é imposible. Ademais, cando lle preguntamos ao Ministerio de Traballo que no caso de ter que fichar como teriamos que facelo non nos deu unha resposta, é dicir, non saben como facelo. é que non ten sentido", explicou.