O pleno da Corporacióon Municipal budetense sacou adiante na súa sesión ordinaria do luns varias propostas e mocións. Entre elas, e por unanimidade, acordouse suprimir a taxa de cadeiras e mesas en terrazas ata novo aviso para os locais de hostalería do municipio.
A edil de Promoción Económica, Silvia Carballo, sinalou que esta medida forma parte dos esforzos do Concello por axudar a un dos sectores máis afectados pola pandemia e anunciou que nas próximas semanas presentarán outras á Asociación de Hostalería de Bueu, coa que "levamos meses mantendo reunións tanto dende o goberno local como dende a Mancomunidade"-
Entre os puntos do día, a Corporación aprobou tamén o expediente de contratación do servizo de colaboración na xestión tributaria, inspectora e recadatoria. Este último contrato, que saíu adiante cos votos a favor de BNG e PP e en contra do PSOE e ACB, aumenta o orzamento nun 20 %, dado que "nestes anos incorporáronse melloras como a administración electrónica ou a Oficina Virtual Tributaria", sinalou o alcalde da localidade, Félix Juncal.
Neste aspecto, o PP mostrou o seu voto favorable ante esta contratación. "É un orgullo que o que no seu día fixo o PP e se criticou, agora se demostre como a fórmula máis viable", sinalaron os populares. Juncal pola súa banda destacou que, a pesar dos esforzos por recuperar o servizo que se externalizou fai 20 anos, "actualmente non é posible a xestión directa".
Doutra banda, a Corporación budetense tratou tamén dúas mocións. A primeira delas, presentada polo BNG, refírese á transferencia da AP-9 a Galicia e a solicitude de rebaixa das peaxes por parte do Goberno estatal. Ante a proposta, aprobada por unanimidade, o PP presentou unha emenda solicitando que se garanta a súa adecuada xestión.
Os populares ademais, levaron a pleno tamén unha moción reclamando o acondicionamento completo da Ruta dos Muíños de face á Semana Santa e o próximo verán. O portavoz do BNG, Xosé Leal, presentou unha emenda que incorpora a responsabilidade que outras administracións públicas deben ter en certos tramos do carreiro.
