Impulsar a recuperación dos pequenos produtores e fomentar o consumo responsable e a alimentación sostible son os principais obxectivos da nova edición do Mercado Ecolóxico e Artesanal de Bueu, o primeiro da vila tras a crise sanitaria. O evento terá lugar este domingo, día 28, na carpa dos Xardíns de Urbano Lugrís-As Lagoas, e reunirá a máis dunha vintena de postos gastronómicos, ecolóxicos e artesáns, así coma charlas e actividades.
A iniciativa, que deu comezo fai xa dez anos, regresa así tras un pequeno parón para ser novamente "unha plataforma para todos os produtores e artesanos, un espazo de divulgación dos seus produtos e unha demostración do compromiso e a necesidade de traballar na concienciación da sociedade", explicou este martes o alcalde da localidade, Félix Juncal, durante a presentación.
Precisamente servir de impulso para un dos sectores máis afectados pola crise sanitaria é unha das súas principais finalidades. Tal e como explicou a técnica de desenvolvemento local, Sonia Cabodevila, o parón neste tipo de eventos supuxo un importante efecto negativo nas ganancias de pequenos produtores que xeraban a maior parte dos seus ingresos en feiras e mercados coma este.
A edil de Promoción Económica, Silvia Carballo, destacou pola súa banda a importancia deste evento, "que demostra o compromiso polos produtos locais e a concienciación medioambiental na sociedade". Por este mesmo motivo, todos os postos que participan no evento deben cumprir unha serie de requisitos e, aqueles que teñen a etiqueta ecolóxica, cobran preferencia sobre outros.
O obxectivo é fomentar o produto local, de quilómetro cero e de tempada, ofrecendo unha ampla variedade de artigos, pero tamén unha oferta gastronómica e de ocio, con actividades paralelas pensadas para todos os públicos.
O encontro pretende servir tamén coma un punto de reunión para os diferentes produtores no que poder intercambiar experiencias e un impulso para o tecido comercial e hostaleiro da localidade no seu conxunto, que se beneficien da visita de persoas interesadas de toda a comunidade.
Xa pola tarde, ás 17.30 horas, haberá un obradoiro de decoración de pezas de olería para a rapazada.
