A caixa de correos da Praza de España que recolle os tickets de compra dos veciños participantes no concurso de 100 tarxetas regalo de 50 euros do Concello, comeza a encherse.
Os concelleiros Manuel Santos e Marián Sanmartín presentaron este sábado a imaxe final destes cartóns regalo que os afortunados que as obteñan poderán gastalas no comercio local.
Esta campaña de incentivación directa do consumo ten por finalidade "non só axudar á economía local nesta época de maior consumo, como é o Nadal, senón tamén despois, xa que as tarxetas poderán gastarse tamén durante o mes de febreiro, que xa de por si é malo para o sector", explicou Sanmartín.
Os interesados en participar no sorteo destas 100 tarxetas terán que realizar unha compra de 30 euros como mínimo nos comercios da localidade. Poderán facelo nun só ticket ou en varios e deberán depositalos grapados na caixa de correos situada na caseta de Turismo da Praza de España. Poderá participarse tantas veces como se desexe sempre que os recibos de compra superen esa cantidade. No reverso de cada ticket deberase indicar o nome e apelidos da persoa que participa e o DNI.
As compras para participar poderanse realizar ata o próximo 16 de xaneiro e será o día 18 cando se sorteen as tarxetas regalo por valor de 50 euros, que se entregarán os días 20 e 21 na Oficina de Turismo. O día 19 faranse públicos os gañadores a través das redes sociais, a páxina web e o taboleiro de anuncios do Concello.
Os premiados poderán utilizar estas tarxetas ata o 27 de febreiro en todos os comercios da vila con la única excepción das farmacias e os supermercados que, pola súa condición de primeira necesidade, non tiveron que cesar a súa actividade.
